ကျွန်တော်ဘလော့ဂါလေးကို လာကြည့်သူအပေါင်းတို့ ကိုယ်စိတ်နှလုံးရွှင်လန်းကြပါစေလို့ဆုမွန်ကောင်းတောင်းလျှက်ပါ၊...

Monday, 15 October 2012

မြန်မာစာရေးသားနည်း

ယတိဗေဒ ခေါ် မြန်မာစာရေးသားနည်း

`မြန်မာစာသည် တို့စာ´
`မြန်မာစကားသည် တို့စကား´ ဟူသည့်အတိုင်း မြန်မာနိုင်ငံသားတိုင်းသည် မြန်မာစာတတ်ရမည်။ မြန်မာစကားပြောတတ်ရမည်ဖြစ်သည်။ မြန်မာစာနှင့် မြန်မာစကား တွင်လည်း `နှုတ်တစ်ရာ စာတစ်လုံး´ ဆိုသည့်အတိုင်း စကားထက် စာက ပိုမို၍ အရေးကြီးလှပါသည်။ ကျနော်တို့တတွေသည် သူငယ်တန်းကတည်းက မြန်မာစာသင်လာရသည်ဆိုသော်လည်း မြန်မာစာ၏ အရေးပါပုံ၊ အသုံးဝင်ပုံ၊ အသုံးပြုပုံ၊ သဒ္ဒါတွေကို ရေရေရာရာနားမလည်ခဲ့ကြပါ။ ကမ္ဘာသုံးစကားဖြစ်သော အင်္ဂလိပ်စာနှင့် ယှဉ်ကြည့်လျှင် မြန်မာစာ၊ မြန်မာသဒ္ဒါသည် စနစ်မကျဟူ၍ ပြောဆိုသုံးသပ်ဝေဖန်နေကြသည်ကို ကြားဖူး၊ ဖတ်ဖူးပါသည်။ ကျနော်တို့ မြန်မာစာသည် ခိုင်မာသော သဒ္ဒါ၊ ခိုင်မာသော စနစ်တစ်ခုရှိသည်ကို မြန်မာအပေါင်းတို့ သိအပ်ရန်အလို့ငှာ၊ မြန်မာအပေါင်းတို့ မြန်မာစာကို ကျွမ်းကျင်ပိုင်နိုင်စွာ တတ်ကျွမ်းရန် အလို့ငှာ ရှေးက မြန်မာပညာရှိ၊ မြန်မာစာဆရာကြီးများ ရေးသားစီရင်အပ်သော မြန်မာစာ၊ မြန်မာသဒ္ဒါ စာအုပ်များကို ပြန်လည်ဖော်ထုတ်မျှဝေရမည်ဖြစ်ပါသည်။ ထိုတာဝန်ကို တစ်ထောင့်တစ်အားပါဝင်သော အလို့ငှာ ယခု ကျနော်သည် မုံရွာမြို့ လယ်တီတိုက်မှ သာသနဓဇဓမ္မာစရိယ ၀ိနယပါဠိပါရဂူ လယ်တီအရှင်ကေလာသ ရေးသားပြုစုအပ်သော ယတိဗေဒ (ခေါ် ) မြန်မာစာရေးနည်း မှ သံခိပ်အကျဉ်းကို တင်ဆက်ပေးလိုက်ပါသည်။

မြန်မာစာရေးနည်း အကျဉ်းမှတ်ဖွယ်
သံခိပ် နိယံ

(၁) ကွက်လပ် ( )
၁။ ၀ိဘတ်တစ်လုံး၊ ဆုံးခဲ့တုံမှတ်၊ ပုဒ်နောက်ရပ်၊ `ကွက်လပ်´ ခြားရမည်။

(၂) ပုဒ်သေး ( ၊ )
၂။ ၀ါကျငယ်ပင်၊ ဆုံးခဲ့လျှင်၊ အစဉ် `ပုဒ်သေး´ချရမည်။
၃။ အမည်ဂုဏ်ပုဒ်၊ ယှဉ်တွဲထုတ်က၊ ဂုဏ်ပုဒ် ရှေ့တွင်၊ `ပုဒ်သေး´၀င်၊ အစဉ်ထားရမည်။
၎။ နေ့စွဲနောက်ရပ်၊ စာအမှတ်နောက်တွင်၊ `ပုဒ်သေး´၀င်၊ အစဉ်ထားရမည်။
၅။ ဂါထာဗန္ဓ၊ ပ,နှင့် တ, တို့၊ ပါဒဆုံးတွင်၊ `ပုဒ်သေး´ ၀င်၊ အစဉ်ထားရမည်။
၆။ ကဗျာစီမှု၊ ရတု စ,စွာ၊ ပါဒအဆုံးတွင်၊ `ပုဒ်သေး´၀င်၊ အစဉ်ထားရမည်။
၇။ သံပေါက် ရှည် တို၊ လင်္ကာကို၌၊ ထိုနည်းအတိုင်းပင်၊ `ပုဒ်သေး´၀င်၊ အစဉ်ထားရမည်။
၈။ သံပေါက်ရေးရာ၊ ရှေးနှစ်ပါဒတွင်၊ `ပုဒ်သေး´၀င်၊ အစဉ်ထားရမည်။
၉။ ရှစ်လုံးဘွဲ့ထုံး၊ ရှစ်လုံးဆုံးက၊ သုံးပါဒတွင်၊ `ပုဒ်သေး´၀င်၊ အစဉ်ထားရမည်။
၁၀။ ဒွေးချိုး, တြိချိုး၊ လေးချိုးကဗျာ၊ ရေးကာစီကြ၊ ချိုးရှေ့မှလျှင်၊ ပါဒနောက်တွင်၊ `ပုဒ်သေး´၀င်၊ အစဉ်ထားရမည်။
၁၁။ တေးထပ်မျိုးမှန်၊ သုံးကဏ္ဍ၀ယ်၊ ရှေ့ပုဒ်သွယ်၌၊ မှတ်ဖွယ် `ပုဒ်သေး´ချရမည်။
၁၂။ စာမျက်နှာများ၊ ပိုဒ်ရေးများကို၊ ညွှန်ကြားရာတွင်၊ များခဲ့လျှင်၊ ကြားတွင်-`ပုဒ်သေး´ ချရမည်။
၁၃။ သို့မဟုတ် ရှေ့တွင်၊ `ပုဒ်သေး´၀င်၊ အစဉ်ချရမည်။
၁၄။ အနက်နောက်တွင်၊ `ပုဒ်သေး´၀င်၊ အစဉ်ချရမည်။

(၃) ပုဒ်ကြီး၊ ပုဒ်မ ( ။ )
၁၅။ စုပေါင်းဝါကျ၊ ရေးခဲ့ကျရာ၊ နောက်ဆုံးမှာ၊ ချပါ ` ပုဒ်ကြီး´တည်း။
၁၆။ တစ်ဝါကျတည်း၊ ပြီးဆုံးခဲ့ရာ၊ ထိုအခါ၊ ချပါ ` ပုဒ်ကြီး´တည်း။
၁၇။ အပိုဒ် နံပါတ်၊ နောက်ရပ်တွင်မှာ၊ ချပါ ` ပုဒ်ကြီး´တည်း။
၁၈။ အမှတ်စဉ်ကို၊ ပြဆို နံပါတ်၊ ထိုနောက်ရပ်၊ ချအပ် `ပုဒ်ကြီး´ တည်း။
၁၉။ သင်္ချာနောက်မှ၊ ပြသည့် သင်္ချေ၊ နောင်၌ပေ၊ ချလေ `ပုဒ်ကြီး´တည်း။
၂၀။ ဂါထာဗန္ဓ၊ ဒု,နှင့် စ,ပင်၊ အဆုံးတွင်၊ ချချင် `ပုဒ်ကြီး´ တည်း။
၂၁။ ကဗျာစီမှု၊ ရတု စ,စွာ၊ ပါဒကုန်သုဉ်း၊ အပိုဒ်ဆုံး၊ သုံးလေ `ပုဒ်ကြီး´တည်း။
၂၂။ သံပေါက် တိုရှည် (ရှည်) ဆုံးတုံပေ၊ သုံးလေ `ပုဒ်ကြီး´တည်း။
၂၃။ ကဗျာရှစ်လုံး၊ ဖွဲ့စီကုံး၊ ပြီးဆုံး `ပုဒ်ကြီး´ တည်း။
၂၄။ ဒွေးချိုး၊ တြိချိုး၊ လေးချိုးရေးထုံး၊ ချိုးပုဒ်ဆုံး၊ စွဲသုံး `ပုဒ်ကြီး´တည်း။
၂၅။ တေးထပ်မျိုးမှန်၊ ကဏ္ဍသုံးခု၊ ဆုံးတုံမှု၊ သုံးပြု `ပုဒ်ကြီး´တည်း။
၂၆။ မှတ်, ညွှန်း ကြောင်းရာ၊ အမှာ, ခြွင်းချက်၊ ပြလျက် နောက်တွင်၊ `ပုဒ်ကြီး´ ပင်၊ အစဉ်နှစ်ချက်တည်း။
၂၇။ ခေါင်းစီး, ထိပ်စီး၊ ရေးပြီးဆုံးရာ၊ ချပါ `ပုဒ်သေး ပုဒ်ကြီး´ တည်း။

(၄) တုံးတို ( - )
၂၈။ ရှေ့နောက် တည်ငြား၊ ပုဒ်နှစ်ပါးမှ၊ စကားလွှဲဆို၊ မရောလို၊ `တုံးတို´ ချလေမြဲ။
၂၉။ ရှေ့နောက် နှစ်လီ၊ မတူညီ၊ လယ်ဆီ `တုံးတို´ ချလေမြဲ။
၃၀။ ဂဏန်းရှေ့သွား၊ စာနောက် ထား၍၊ ရေးသားတုံမြောက်၊ ဂဏန်းနောက်၊ မဖောက် `တုံးတို´ ချလေမြဲ။
၃၁။ အနက်ပေးရာ၊ ပါဠိနောက်တွင်၊ `တုံးတို´ပင်၊ အစဉ်ချစမြဲ။
၃၂။ ဝေါဟာမကုန်၊ စာကြောင်းကုန်၊ တစ်ဖုံ `တုံးတို´ ချစမြဲ။
၃၃။ မိတ္တူပို့ရာ၊ ဖြန့်ဝေရာ၊ ရှေ့မှာ `တုံးတို´ချစမြဲ။

(၅)တုံးရှည်(--)
၃၄။ မိတ္တူဖြန့်ဝေ၊ ပုဒ်နောင်ပေ၊ ချလေ `တုံးရှည်´သာ။
၃၅။ သင်္ချေသရုပ်၊ ရေးစီထုတ်၊ သရုပ်ရှေ့မှာ၊ `တုံးရှည်´သာ။
၃၆။ အဓိပ္ပါယ်ကို၊ ပြန်ဆိုရာဝယ်၊ အဓိပ္ပါယ် နောက်မှာ၊ `တုံးရှည်´သာ။
၃၇။ ပမာ, ပမေ၊ ဆင်လေတန်ဆာ၊ ရေးသောခါတွင်၊ ဥပမာနောက်မှာ၊ `တုံးရှည်´သာ။
၃၈။ ၀ါကျဆုံးလျက်၊ ဆက်ရန်စကား၊ ရှိတုံငြား၊ ချထားမှန်စွာ၊ `တုံးရှည်´သာ။

(၆) အောက်မျဉ်း ( ___ )
၃၉။ ထူးသတိပြု၊ ကြည့်ရှုစေချင်၊ စာပိုဒ်တွင်၊ ထင်ထင် `အောက်မျဉ်း´ဆွဲ။

(၇) ပုဒ်ကန့် ( , )
၄၀။ သရုပ် သင်္ချေ၊ ရေတွက်လေရာ၊ ထိုအခါ၊ ချပါ `ပုဒ်ကန့်´တည်း။
၄၁။ သင်္ချာကိန်းများ၊ သုံးလိုငြားက၊ ငါးလုံးတစ်ဖြာ၊ သုံးလုံးမှာ၊ ထားပါ `ပုဒ်ကန့်´တည်း။
၄၂။ ထက်အောက်စဉ်ခါ၊ ကိန်းသင်္ချာကို၊ ဆုတ်ခါ မြှင့်တင်၊ ရေးလိုလျှင်၊ ၀င်လေ `ပုဒ်ကန့်´တည်း။
၄၃။ မျိုးတူ မည်ကွဲ၊ တစ်ကြောင်းတည်း၌၊ တွဲစပ်ရေးလျှင်၊ ၀င်လေ `ပုဒ်ကန့်´တည်း။

(၈) မီးပြကြီး ( “ “ )
၄၄။ ပြောဟန်, ဆိုဟန်၊ ပြလိုပြန်၊ ထည့်ရန် `မီးပြကြီး´။
၄၅။ အကြံဖြစ်ဟန်၊ ရေးလိုပြန်၊ ထည့်ရန် `မီးပြကြီး´။

(၉) မီးပြကလေး ( ` ´ )
၄၆။ တစ်ဆင့်ပြောဟန်၊ ကြံစည်ဟန်ကို၊ ရေးရန်ကြုံက၊ `မီးပြကြီး´အတွင်း၊ `မီးပြကလေး´ကိုသွင်း။

(၁၀) လက်သည်းကွင်း ( )
၄၇။ ရှေ့ပုဒ်နှင့်မူ၊ သဘောတူ၊ ထည့်ယူ `လက်သည်းကွင်း´။
၄၈။ သင်္ချာနှင့်စာ၊ တူပြရာ၊ သင်္ချာ `လက်သည်းကွင်း´။
၄၉။ ကိန်းဂဏန်းမှာ၊ သင်္ချာ နှင့် စာ၊ နှစ်ဖြာရေးလျှင်၊ စာတွင် `လက်သည်းကွင်း´။
၅၀။ ပိုဒ်ခွဲ က,ခ၊ ရေးသုံးက၊ ထည့်ကြ `လက်သည်းကွင်း´။
၅၁။ ဇယားကွက်ထား၊ အမှတ်များ၊ ရေးသား `လက်သည်းကွင်း´။

(၁၁) တွန့်ကွင်း { }

၅၂။ မြန်မာစာလုံး၊ `တွန့်ကွင်း ´သုံး၊ လုံးလုံးမရှိပါ။

(၁၂) ထောင့်ကွင်း [ ]

၅၃။ ရည်ညွှန်း, မှတ်ချက်၊ ရှင်းလင်းချက်နှင့်၊ ခြွင်းချက်တို့မှာ၊ `ထောင့်ကွင်း´သာ။

၅၄။ သတိပြုစရာ၊ အမှာစကား၊ ရေးစီသား၊ ထည့်ငြား `ထောင့်ကွင်း´သာ။

(၁၃) တစ်ဘက်ကွင်းရှည် -}

၅၅။ အရေးကြီးလာ၊ ကြောင်းခြင်းကို၊ ပေါင်းကာစုကြ၊ `တစ်ဘက်ကွင်းရှည်´ကိုပြ။

၅၆။ စကားပေါရာ၊ များတုံပါလည်း၊ ဓိပ္ပာ, အတ္တ၊ တစ်ခုရ၊ `တစ်ဘက်ကွင်းရှည်´ကိုပြ။

(၁၄) ခရေပွင့် ( * )

၅၇။ အောက်ခြေမှတ်စု၊ ညွှန်းပြမှု၊ ရေးပြု `ခရေပွင့်´။

(၁၅) မျဉ်းစောင်း ( / )

၅၈။ သို့မဟုတ်ကို၊ ခြုံးပြလို၊ သုံးလို `မျဉ်းစောင်း´သာ။

(၁၆) အမေးလက္ခဏာ ( ? )

၅၉။ အမေးစာသား၊ ရေးစီငြား၊ ပြထား `အမေးလက္ခဏာ´ တည်း။

(၁၇) အာမေဍိတ် ( ! )

၆၀။ ကြောက်ခြင်းစာသား၊ အကြောင်းများကြောင့်၊ စကားပြောဟန်၊ ရေးလိုပြန်၊ ထားရန် `အာမေဍိတ်´ လက္ခဏာတည်း။

(၁၈) ချန်ကွက် ( ….. )
၆၁။ တမင်ချန်လျက်၊ အညွှန်းဆက်၊ `ချန်ကွက်´ကိုသာသုံးလေတည်း။

(၁၉) မြုပ်ကွက် ( … )

၆၂။ ကြွင်းကျန်စာမှတ်၊ နည်းတုံလတ်၊ ချအပ် `မြုပ်ကွက်´တည်း။

(၂၀) မြုပ်ကွက်များ ( …… )

၆၃။ ကြွင်းကျန်စာမှတ်၊ များတုံလတ်၊ ချအပ် `မြုပ်ကွက်များ´သာတည်း။

မြန်မာစာရေးနည်း အကျဉ်းမှတ်ဖွယ်
သံခိပ် နိယံ ပြီးပြီ။

No comments:

Post a Comment

Related Posts Plugin for WordPress, Blogger...