တစ်ခါက ဘိုးတော်ဘုရား နဲ့ မိဖုရားကြီး တို့ဟာ ဧရာဝတီမြစ်ကမ်း ထိပ်က ရွှေကြက်ကျ နဲ့ ရွှေကြက်ယက် ဘုရားတွေ ကို ဘုရားဖူး ထွက်တော်မူပါတယ်။ ဘုရားဖူးပြီးတော့ ဘိုးတော်ဘုရား ဟာ စိတ်ရွှင်လန်းနေပါတယ်။ ပြီးတော့ မြစ်ဘက် ကို ကြည့်တယ်။ မြစ်ကိုကြည့်ပြီး အတွေးတစ်ခုပေါ်လာတာကြောင့် ဦးပေါ်ဦး ကို လှမ်းမေးလိုက်တယ်။
“ဟဲ့ ပေါ်ဦး ၊ ဒီမြစ်ကို ဟိုဘက်ကမ်းရောက်အောင် ကူးနိုင်ပါ့မလား” မြစ်ရေ ကို လက်ညိုး ထိုးပြီး ပြတော် မူတော့ ဦးပေါ်ဦး က ရေပြင်ကို လှမ်းကြည့်ပြီး ဖြေတယ်။
” ဒီမြစ်ကို မပြောနဲ့ ဒီမြစ်ထက် အဆပေါင်းများစွာ ကျယ်တဲ့ မြစ်ကိုတောင် ဖြတ်ကူးနိုင်ကြောင်းပါဘုရား”
ဘိုးတော်ဘုရား လည်း ဒီတစ်ခါတော့ ပေါ်ဦး ကို နိုင်ကွက်တွေ့ပြီ ၊ အပြော နဲ့ အလုပ် မညီလို့ ကတော့ တွေ့ပြီပေါ့ ပေါ်ဦးရယ် လို့ တေးပြီး …
“ကဲ..ဒါဖြင့် ပေါ်ဦး မင်းကူးပြစမ်းကွယ်”
ဦးပေါ်ဦး ကလည်း ချက်ချင်းပါပဲ။ ၀တ်ထားတဲ့ စလွယ်တွေ ခေါင်းဆောင်းတွေ ကို ချွတ်တယ်။ ပုဆိုး ကို သေသေ ချာချာ ခါးတောင်းကျိုက် လိုက်တယ်။ အဲဒီနောက်တော့ မြစ်ဘက် ကို ပြေးသွားပါတယ်။ မြစ်ထိပ်ကိုရောက်တော့ မြစ်ထဲကို မဆင်းပဲ ဟိုဘက်ပြေးလိုက် ၊ ဒီဘက်ပြေးလိုက် ၊ ရပ်မျှော်ကြည့်လိုက် အဲဒီ အတိုင်းလုပ်နေတယ် ။
ကြာလာတော့ ဘိုးတော်ဘုရား က စိတ် မရှည်တော့ဘူး ။ ဦးပေါ်ဦး ကို အခေါ် လွှတ်လိုက်တယ်။ ဦးပေါ်ဦးဘုရင် ရဲ့ ရှေ့ကိုပြန်ရောက်လာတယ်။
“ဟဲ့ ပေါ်ဦး ဟိုဘက်ကမ်းကို ကူးမယ်ဆို ၊ ဘယ်နှယ် မကူးပဲ ဟိုပြေး ဒီပြေး လုပ်နေတာလဲ”
” ဟိုဘက်ကမ်းကို ကူးဖို့ လှေ ရှာနေတာပါဘုရား ”
” ဟဲ့ ဘာပြောတယ်မောင်မင်း ၊ မောင်မင်းပြောတော့ ဖြတ်ကူးပြမယ်ဆို ၊ ပြန်လျှောက်တင်စမ်းဟ”
” ကျွန်တော်မျိုး တောင်ပြေး မြောက်ပြေး ပြေးနေတာဟာ ဟိုဘက်ကမ်း ကို ကူးဖို့ လှေရှာနေတာပါဘုရား”
“ဖြစ်ရလေ ပေါ်ဦးရယ် ၊ လှေ နဲ့ ကတော့ လူတိုင်း ကူးတတ်တာပေါ့ဟဲ့”
” မှန်ပါ ၊ ဘုရား ကျွန်တော်မျိုးလည်း လူထဲက လူ တစ်ယောက်သာ ဖြစ်တဲ့ အတွက် အများနည်းတူ လှေနဲ့ ကူးနိုင်ကြောင်းပါဘုရား”
မင်းတရားကြီး ရင်ဘတ်ကို ဖိကာ ရယ်တယ်။ မိဖုရားကြီးက ၀င်ပြီး ‘နင် လုပ်လိုက်ရင် ဒီလိုချည်းပဲ ‘ လို့ ပြုံး ပြုံးကြီး မိန့်တော်မူပါတယ်။
No comments:
Post a Comment